Posted on

Shayad voh poetry nahi

Agar tumhaara koi ek guitarist dost ban Gaya hai,
Jo tumhaari tez aur dheere bolne ne skill ko
poetic sound karvaane lag gaya hai,
Aur ise tum poetry kehne lag gaye ho,
Toh ho sakta hai tum galat ho.

Kyunki tez aur dheere toh mere PT sir bhi mujhe bhaga lete the.

Agar Delhi yaa Mumbai kaa koi sexy cafe background mein lekar,
Aur haath mein mike ke saath dp khichwaakar tumhe likes mil rahe hain,
Aur ise tum poetry kehne lag gaye ho,
Toh ho sakta hai tum galat ho.

Kyunki likes toh sirf pout aur top shot se bhi mil jaate hain.

Aur agar tum raat ko baat se,
Aur time ko mime se rhyme karne lag gaye ho,
Aur isse tum poetry kehne lag gaye ho
Toh ho sakta hai tum galat ho

Kyunki rhyme toh main bachpan mein “Roses and Red sky is blue, Oh dear Reema I love you” bolkar main bhi kar leta tha.

Agar agar tumne poetry ki naam par
Sirf ‘The road not taken’ pada hai
Aur tab bhi tum apni likhne ko poetry kehne lag Gaye ho,
Toh ho sakta hai tum galat ho,

Kyunki sirf ‘The road not taken’ padne waala poet poet nahi,
School kaa student hai.

Aur agar tum India aur Pakistan mein Aman aur Shaanti ke topic par poetry likhte ho,
Aur ise tum poetry kehne lag Gaye ho,
Toh ho sakta hai tum galat ho,

Kyunki tum galat nahi tum chaalu ho.
Kyunki tumhe pata hai dono taraf se likes milenge aur India aur Pakistan mein ghanta koi aman Shaanti nahi hone waali.

Aur agar tumhaari ghatiya rhyming par snapping kaa clapping aane lag gayi hai,
Aur isse tum poetry bolne lag gaye ho,
Toh ho sakta hai tum galat ho,

Kyunki bhookon ko khaana
Aur first time listeners ko kaisa bhi content pasand aa jaata hai

Par agar tumhaari videos viral hone lag gayi hai,
Agar tumhaari castism, racism sexism ki daaru par baatein hone waali discussions logon ko stage par bhaane lag gayi hain.
Aur agar tumhaari mike waali DP par tumhaare tinder ke matches bad gaye hain,
Toh is skill ko pakad lo jakkad lo gale lagaalo,
Kyunki haan, haan, haan yahi poetry hai!

Aur iss chutiyaape ko logon ko poetry samjhaane mein zindagi kaa kaafi lamba hissa nikal jaata hai

Note: This poem was just for laughs, hope this made you smile. I love all you lovely writers/poets 🙂

Posted on

Nani, tu badi yaad aati hai

So it’s been exactly two months since I lost my nani. Been trying hard to write this for her, but would stop writing because I ended up crying and missing her too much. Dedicating this to my nani, who was the most beautiful and chirpy woman I know. Love you, wherever you are 🙂

Waqt ho gaya hai ab tujhe mujhe chhode hue,
Par naa jaane kyun teri yaad mujhe chhod kar nahi jaati hai,
Nani tu bada yaad aati hai

Pyaar karne waale toh bohot hain,
Par kisi kaa pyaar vaisa nahi, jaise tu sir par fer kar kar jaati thi,
Naani tu badi yaad aati hai

Kaun mujhe chhup chhup pyaar kar 500 ke note de jaayega, jaise tu de jaati thi?
Kaun mujhe “Puttar tu bada kamzor ho gaya hai” keh kar ghee mein latpat paranthe khilaayega, jaise tu khilaati thi?
Naani tu badi yaad aati hai.

Kaun mujhe baagdo billi aur sarla behenjee ki kahaaniya sunaayega, jaise tu sunaati thi
Naani tu badi yaad aati hai.

Tere ghar abhi bhi jaata hun, Aur use abhi bhi naani kaa ghar kehlata hun,
Bas kami itni hai uss ghar mein nani tu nahi,
Voh ghar toh hai, par uss ghar mein uski ruh nahi

Jhooth nahi bolunga, toota zarur hun andar se
Teri arthi uthaane kaa, tujhe aakhri saans lete dekhne kaa gam abhi bhi zinda hai mujhme,
Par fir bhi dil khol kar, muskuraakar jee raha hun, Bilkul vaise jaise tu muskuraati thi,
Nani tu badi yaad aati hai.

If you enjoyed the poem above, sharing a beautiful video of my nani that I shot when she was with us.

https://www.facebook.com/suman.pruthi.9/videos/1404312876330659/

Posted on

Khushi se itna pyaar kyun karta hai tu?


Khushi se itna pyaar kyun karta hai tu,
Ek baar gam se haath mila kar toh dekh

Jeet ke itne peeche kyun pada hai tu,
Ek baar zara saa haar ke toh dekh

Khushi mehsus karne kaa Mazaa hi kya,
Agar gam kaa aansu nahi piya.

Pyaar karne aur paane ki voh ada hi kya,
Agar tanha nahi jiya

Jab mausam chaar hai, aur phool anek,
Toh khushi ko gam se zyada pyaar kyun karta hai tu,
Uss dost ko khone ke bhay se, pyaar karne se kyun darta hai tu.

Buzdil ki tarah ghut-ghut ke kyun jeeta hai,
Ek baar apni awaaz duniya ko suna kar toh dekh.

Khushi se itna pyaar kyun karta hai tu,
Ek baar gam se haath mila kar toh dekh.

Posted on

Dil ko thoda toh dhadakne do

Zindagi Ek baar jeene ko mili hai,
Usko khul ke toh jeene do,
Hasne do, rone do, jeetne do, haarne do,
Par dil ko thoda toh dhadakne do.
Thodi galtiyaan mujhe tum karne do,
Pyaar thoda mujhe karne do,
Thoda saa dvesh bhi tum rakhne do,
Dil ko thoda toh dhadakne do.
Us pahaad par mujhe Chadne do, baarish ke paani ko, uss chidiya ki chahak ko, phool ki mehak ko thoda toh mehsus karne do,
Dil ko thoda toh dhadakne do.
Sapne mujhe tum dekhne do,
Tutne do, bikharne do, aur fir se uthkar chalne do,
Dil ko thoda dhadakne do.
Voh bachcha abhi bhi Zinda hai mujhme, jo darna nahi jaanta, sirf khushi jaanta hai.
Apne usoolon se use ghutne mat tum do, saans use toh tum Lene do,
Dil ko thoda toh dhadakne do.
Agar kisi aur ke Jaise Zindagi hi jeeni thi, toh murda mujhe tum banne toh.
Agar aisa nahi hai, toh Thoda matlabi mujhe tum banne do,
Dil ko thoda tum dhadakne do.